ރައްޔިތުންގެ މަޖިލީހުގެ ތިން މެންބަރަކަށް ހެޔޮއެދޭ މީހުންގެ ފަރާތުން ހަދިޔާގެ ގޮތުގައި ފައިސާ ލިބިފައިވާކަން އެ މެންބަރުން މަޖިލީހަށް ހުށަހެޅުއްވި މާލީ ބަޔާންތަކުން ހާމަވެއްޖެއެވެ.
މަޖިލީހުގެ ވެބްސައިޓުގައި މިއަދު ޝާއިއުކޮށްފައިވާ މާލީ ބަޔާންތަކުން ދައްކާ ގޮތުގައި ހަދިޔާގެ ގޮތުގައި ފައިސާ ލިބިވަޑައިގެންފައި ވަނީ ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ އާއި ހުޅުމާލެ ދެކުނު ދާއިރާގެ އެމްޑީޕީ މެންބަރު އަހްމަދު ޝަމްހީދު އަދި މާފަންނު ދެކުނު ދާއިރާގެ މެންބަރު އަބްދުﷲ ރިފާއު އަށެވެ.
އެގޮތުން، މަޖިލީހުގެ ރައީސް އަބްދުއްރަހީމްގެ މާލީ ބަޔާނުން އެނގޭ ގޮތުގައި އެމަނިކުފާނަށް ހެޔޮ އެދޭ މީހުންގެ ފަރާތުން 120،191.76 ރުފިޔާ ލިބިފައިވެއެވެ. އަދި އެ ފައިސާ ޚަރަދުކުރައްވާފައި ވަނީ ދަތުރުފަތުރު ކުރުމަށާއި ކްރެޑިޓް ކާޑުތަކުގެ ފައިސާ ދެއްކުމަށް ކަމަށް ބަޔާންކޮށްފައިވެއެވެ.
މެންބަރު ޝަމްހީދަށް ހެޔޮ އެދޭ މީހުންގެ ފަރާތުން ހަދިޔާގެ ގޮތުގައި 36،000 ޑޮލަރު ލިބިފައިވާއިރު، މެންބަރު އަބްދުﷲ ރިފާއުއަށް ހެޔޮއެދޭ މީހުންގެ ފަރާތުން ތިން ލައްކަ ރުފިޔާ ލިބިފައިވެއެވެ. ނަމަވެސް އެ ދެ ބޭފުޅުން އެ ފައިސާ ހަރަދުކުރެއްވި ގޮތެއް މާލީ ބަޔާނުގައި ހާމަކުރައްވާފައެއް ނުވެއެވެ.
ރައްޔިތުންގެ މަޖިލީހުން ހާމަކޮށްފައިވާ ގޮތުގައި، މާލީ ބަޔާން ހުށަހެޅުމަށް ކަނޑައެޅި ސުންގަޑި ކަމަށްވާ އޮގަސްޓް 31 ގެ ނިޔަލަށް މާލީ ބަޔާން ހުށަހަޅުއްވާފައިވަނީ މަޖިލީހުގެ 93 މެންބަރުންގެ ތެރެއިން 91 މެންބަރުންނެވެ.
ސުންގަޑިއަށް މާލީ ބަޔާން ހުށަނާޅުއްވަނީ މައްޗަންގޮޅި އުތުރު ދާއިރާގެ މެންބަރު އިބްރާހިމް މުހައްމަދު (ޖަނާބު)އާއި ނައިފަރު ދާއިރާގެ މެންބަރު ޔާސީން އަބްދުﷲއެވެ.
މަޖިލީހުން އާންމުކޮށްފައިވާ މާލީ ބަޔާންތަކަކީ އަހަރެއްގެ ތެރޭގައި ލިބުނު އާމުދަނީ އާއި ބޭންކު އެކައުންޓުތަކުގައި ހުރި ފައިސާ އާއި އަމިއްލަ ނަމުގައި ހުރި ދަރަންޏާއި ލޯނުތަކުގެ އިތުރުން މިލްކިއްޔާތުގައި ހުރި މުދަލުގެ ތަފުސީލު ހިމަނައިގެން ހުށަހަޅަންޖެހޭ ބަޔާންތަކެކެވެ.
މީގެ އިތުރުން، އެއްވެސް ކުންފުންޏެއްގެ ހިއްސާ އޮތް ނަމަ އޭގެ ތަފުސީލާއި، ނަގުދު ފައިސާ ހުރި އަދަދާއި، ވިއްކާލާފައިވާ މުދަލުގެ ތަފުސީލު އަދި އިންޓެލެކްޗުއަލް ޕްރޮޕަޓީގެ ގޮތުގައި ބެލެވޭ އެއްޗެއްސާ ގުޅޭ ތަފުސީލުތައް ވެސް މި ބަޔާންތަކުގައި ހިމަނަން ލާޒިމުކުރެއެވެ.
ދިވެހިރާއްޖޭގެ ޤާނޫނުއަސާސީގެ 84 ވަނަ މާއްދާއާއި ރައްޔިތުންގެ މަޖިލީހުގެ ޤަވާއިދުގައިވާ ގޮތުން، މަޖިލިސް މެންބަރުން މަޤާމާ ޙަވާލުވުމަށްފަހު އަދި ކޮންމެ އަހަރަކު އެއްފަހަރު އެ މެންބަރެއްގެ މާލީ ބަޔާން ތައްޔާރުކޮށް މަޖިލީހުގެ އަމީން ޢާންމަށް ހުށަހަޅަންޖެހެއެވެ.
ފާހަގަކުރެވޭ ގޮތުގައި މާލީ ބަޔާނުގައި މެންބަރަށް ލިބޭ އާމްދަނީއާއި ޚަރަދުތަކާއި، މިލްކިއްޔާތުގައިވާ ބިމާއި އިމާރާތް، ވިޔަފާރި، ޙިއްޞާ، އަދި ބޭންކު އެކައުންޓްތަކުގައިވާ ފައިސާގެ މަޢުލޫމާތު ހިމަނަންޖެހެއެވެ.
މީގެއިތުރުން މެންބަރުގެ ނަމުގައިވާ ދަރަނިތަކާއި، އަނބިކަނބަލުން ނުވަތަ ފިރިކަލުން އަދި 18 އަހަރު ނުފުރޭ ދަރިންގެ މާލީ މަޢުލޫމާތުވެސް މި ބަޔާނުގައި ހިމެނެންޖެހެއެވެ.