މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން، މައުލޫމާތު ފޯރުކޮށްދިނުމުގައި އިދާރާތަކަށް ދިމާވާ ދަތިތަކަށް ހައްލެއް ހޯދުމަށް، އިންފޮމޭޝަން ކޮމިޝަނަރުގެ އޮފީސް (އައިކޮމް)އިން އދ.އާއެކު މަސައްކަތް ކުރަމުން އަންނަ ކަމަށް އެ ކޮމިޝަނުން މިއަދު ބުނެފިއެވެ.
މައުލޫމާތު ހޯދައި ލިބިގަތުމުގެ ހައްގުގެ ބައިނަލްއަގުވާމީ ދުވަހުގެ މުނާސަބަތުގައި ނެރުނު ބަޔާނުގައި އައިކޮމްއިން ވަނީ، ދައުލަތުގެ ކަންކަން ސާފުކުރުމަށް ޓަކައި މައުލޫމާތަށް އެދޭ މިންވަރު އަހަރަކަށް ވުރެ އަހަރެއް އިތުރުވަމުން އަންނަ ކަމަށް ބުނެފައެވެ.
އެ ކޮމިޝަނުން ބުނި ގޮތުގައި މި އަހަރުގެ މިހާތަނަށް އެ އިދާރާއަށް 745 ވޭދަނަ ނުވަތަ ކޭސް ހުށަހަޅައިފައިވާއިރު، 260އަށްވުރެ ގިނަ ވޭދަނަ ވަނީ ނިންމައިފައެވެ. މަދު މުވައްޒަފުންތަކެއް މަސައްކަތް ކުރާ އެ އޮފީހަށް އެވަރެޖުކޮށް ދުވާލަކު މަދުވެގެން ހަތަރު ހުށަހެޅުން ހުށަހަޅާކަން އައިކޮމްއިން ފާހަގަކުރިއެވެ.
އެ ކޮމިޝަނުން ބުނި ގޮތުގައި ހުށަހެޅުންތައް އިތުރުވުމަކީ ކާމިޔާބީއެއް ނޫނެވެ. އޭގެ ބަދަލުގައި ކާމިޔާބީއަކަށް ވާނީ، އަމިއްލަ އިސް ނެގުމުގެ މަތީން ދައުލަތުގެ އިދާރާތަކުން މައުލޫމާތު އާންމުކުރަމުން ދިޔުމުން، ރައްޔިތުން މައުލޫމާތު ހޯދުމަށް އިދާރާތަކުގައި އެދެން ޖެހޭ މިންވަރު މަދުވުން ކަމަށް އައިކޮމްއިން ފާހަގަކުރިއެވެ.
"އޭރުން ރައްޔިތުންނަށާއި ދައުލަތުގެ އިދާރާތަކަށް ވެސް ވަރަށް ބޮޑު ލުއިފަސޭހައަކަށްވާނެއެވެ. އެހެންކަމުން މި ނުކުތާއަށް ސަމާލުކަން ދެއްވުމަކީ ދައުލަތުގެ ހުރިހައި އިދާރާއަކަށް ނުހަނު އިޙުތިރާމާއި އިޚުލާސްތެރިކަމާއެކު، ކުރާ އިލްތިމާސެކެވެ." ކޮމިޝަނުގެ ބަޔާނުގައިވެއެވެ.
މީގެ އިތުރުން އައިކޮމްއިން ވަނީ، ފަސާދައިން ސަލާމަތްވެފައިވާ ނަޒާހާތްތެރި ދައުލަތެއް ބިނާކުރުމަށް ޓަކައި މައުލޫމާތަށް އެދުމާއި ލިބިގަތުމުގެ ހައްގަކީ ވަރަށް މުހިންމު ކަމެއް ކަމުގައިވީ ނަމަވެސް، ބައެއް މުއައްސަސާތަކުން އެކަމަށް ދޭ ސަމާލުކަން އަދިވެސް ވަރަށް ކުޑަ ކަމަށް ބުނެފައެވެ. އެއީ އެ މަސައްކަތް ކުރުމުގައި އިދާރާތަކަށް ކުރިމަތިވެފައިވާ ދަތިތަކާ ހުރެ ދިމާވާ ކަމެއް ކަމަށް ވެދާނެ ކަމަށް ވެސް އައިކޮމްއިން ވަނީ ބުނެފައެވެ.
އެހެންވެ، އެފަދަ ދަތިތައް ހައްލުކުރުމުގައި އެހީތެރިވެވޭނެ ފަދަ އިންތިޒާމެއް ހަމަޖެއްސޭތޯ އދ.ގެ ތަރައްގީއާ ބެހޭ ޕްރޮގްރާމާ ގުޅިގެން މަސައްކަތްތަކެއް ކުރަމުން އަންނަކަން އައިކޮމްއިން ވަނީ ހާމަކޮށްފައެވެ.
ފާހަގަކޮށްލެވޭ ގޮތުގައި، އިންފޮމޭޝަން ކޮމިޝަނަރު ކަމަށް އައު ބޭފުޅަކު މި މަހު ވަނީ އައްޔަންކޮށްފައެވެ. އެއީ އެ މަގާމުގައި ކުރިން ހުންނެވި އަހުމަދު އާހިދު ރަޝީދުގެ ފަސް އަހަރުގެ ދައުރު ހަމަވުމުންނެވެ. އެ މަގާމުގައި މިހާރު ހުންނެވީ، ރާއްޖޭގެ ފުރަތަމަ އިންފޮމޭޝަން ކޮމިޝަނަރުކަން ކުރެއްވި ޢަބްދުލްޢަޒީޒު ޖަމާލް އަބޫބަކުރެވެ.
ދައުލަތުގެ އިދާރާތަކުން އަމިއްލައަށް އިސްނަގައިގެން މައުލޫމާތު ހާމަނުކުރުމުގެ އިތުރުން، މައުލޫމަށް އެދުމުން ވެސް ސިއްރުކޮށް، ކަންކަން ހާމަކުރަން ދެކޮޅު ހެދުމުގެ ކަންބޮޑުވުންތައް ފަހަކަށް އައިސްވަނީ އިތުރުވެފައެވެ.