ކުރީ ސަރުކާރުގައި ގައުމީ އެއާލައިން މޯލްޑިވިއަން ވަރަށް ބޮޑަށް ދަރައިފައި އޮތުމަށްފަހު، މިހާރު އެ އެއާލައިން ރަނގަޅު މިސްރާބަކަށް ދަތުރުކުރަން ފަށައިފައިވާ ކަމަށް، ޓޫރިޒަމް އަދި ސިވިލް އޭވިއޭޝަން މިނިސްޓަރު މުޙައްމަދު އަމީން މިއަދު ވިދާޅުވެއްޖެއެވެ.
މޯލްޑިވިއަންގެ އައު ސީޕްލޭން ޓާމިނަލް ހުޅުވުމަށް ބޭއްވި ރަސްމިއްޔާތުގައި ވާހަކަ ދައްކަވަމުން އަމީން ވިދާޅުވީ މީގެ ކުރިން މޯލްޑިވިއަނަކީ އެއް ދުވަހުން އަނެއް ދުވަހަށް އަމިއްލަ ބާރުގައި ކުރިއަރައި ދިޔަ އެއާލައިނެއް ކަމަށެވެ. އެގޮތުން 2018ވަނަ އަހަރުގެ ނިޔަލަށް ހުރިހާ އަހަރެއްގައި ވެސް މޯލްޑިވިއަނަށް އައީ ފައިދާވަމުން ކަމަށް، އަމީން ވިދާޅުވިއެވެ.
އަމީން ވިދާޅުވިގޮތުގައި ސީޕްލޭންގެ ޚިދުމަތް ދޭން މޯލްޑިވިއަނުން އޭރު ފެށީ އަމިއްލަ ޚަރަދުގައެވެ.
"އެއާލައިންގެ މަސައްކަތުގެ ކޯސްއިން ހުންގާނު ނައްޓައިލައިފިއްޔާމު ވާނެ ނޫނީ ވެދާނެ ހިތި ނަތީޖާ މި ކުންފުނި އޮންނާނީ ދެކިފައި، 2018އިން ފެށިގެން 2023އާ ހަމައަށް އައިއިރުގައި އެނގިވަޑައިގަންނަވާނެ ކުންފުނި އޮތީ ވަރަށް ބޮޑު ދަރަންޏެއްގެ ތެރެއަށް ވެއްޓިފައި، އަދި ޚާއްސަކޮށް ސީޕްލޭން މުޅި އޮޕަރޭޝަންސް ހުއްޓުމަކަށް އައިސް އޭރު ސާވިސްކުރަމުން ދިޔަ ކޮންޓްރެކްޓްތަކެއް ގެއްލި ވަރަށް ބަލިކަށި ހާލަތަކަށް ކުންފުނި އައިސްފަ،" އަމީން ވިދާޅުވިއެވެ.
އެއަށްފަހު 2023ވަނަ އަހަރުގެ ފަހުން މޯލްޑިވިއަންގެ ހިންގުމަށް ގެނައި ބަދަލުތަކާ ގުޅިގެން އެ އެއާލައިންގެ ހާލަތު ބަދަލުވެފައިވާ ކަމަށް ވިދާޅުވެ އަމީން ވިދާޅުވީ، ފަސް އަހަރުވަންދެން ބޮޑު ދަރަންޏެއްގައި މޯލްޑިވިއަން ހިންގުމަށް ފަހު މިހާރު އެ އެއާލައިނަށް ފައިދާވަމުން އަންނަ ކަމަށެވެ. އަމީން ވިދާޅުވީ އެކަން މިދިޔަ އަހަރުގެ ހިސާބުތަކުން ފެނުނު ކަމަށެވެ.
މޯލްޑިވިއަނަކީ ދިވެހީންގެ ފަޚުރެއްގެ ގޮތުގައި އަމީން ވަނީ ސިފަކުރައްވައިފައެވެ.
މިއަދު ހުޅުވި މޯލްޑިވިއަންގެ އައު ސީޕްލޭން ޓާމިނަލް ފަރުމާކޮށްފައިވަނީ ރާއްޖޭގެ ގުދުރަތީ ރީތިކަމާއި ސަގާފަތް ދައްކުވައިދޭ ފަދަ ގޮތަކަށެވެ. ޒަމާނީ ފެންވަރަކަށް ތަރައްގީކުރި މި ޓާމިނަލް ހުންނާނީ އޭސީކޮށްފައެވެ.
މޯލްޑިވިއަނުން ބުނީ މި ޓާމިނަލުގެ އެތެރޭގައި ޖުމުލަ 90 މީހުންނަށް އެއްފަހަރާ ޚިދުމަތްދެވޭނެ ކަމަށާއި، އަދި ޓާމިނަލުގެ ބޭރުގައި އެއްފަހަރާ 40 މީހުންނަށް ޚިދުމަތްދެވޭނެ ކަމަށެވެ.
ދެ ފަންގިފިލާގެ މައްޗަށް އެކުލެވޭ މި ޓާމިނަލުގައި މޯލްޑިވިއަންގެ ސުވެނިއާ އާއި ކާބޯތަކެތި ހުންނަ ކިއޯސްކެއް ވެސް ހުންނާނެ ކަމަށާއި އެއް ފަހަރު ބޭނުންކުރުމަށް ފަހު އުކައިލާ ޕްލާސްޓިކު ރީސައިކަލްކުރެވޭނެ ގޮތް ވެސް ޓާމިނަލުގެ ތެރޭ ހަމަޖެހިފައިވާ ކަމަށް، މޯލްޑިވިއަނުން މައުލޫމާތުދެއެވެ.
މޯލްޑިވިއަން ހިންގާ އައިލެންޑް އޭވިއޭޝަން ސާވިސަސްއަށް ވޭތުވެދިޔަ އަހަރުތަކުގައި ބޮޑެތި މާލީ ގެއްލުންތަކެއް ލިބިފައިވެއެވެ. ދެހާސް ސައުވީހުގައި އެ ކުންފުންޏަށް 2.82 މިލިއަން ރުފިޔާގެ ގެއްލުން ލިބުނުއިރު، އެއީ އެ ކުންފުންޏަށް ޖެހިޖެހިގެން ގެއްލުމާ ކުރިމަތިލާން ޖެހުނު ފަސް ވަނަ އަހަރެވެ.