ޒަމާނީ ބަދަލުތަކާއެކު، ގައުމީ އެއާލައިން މޯލްޑިވިއަންގެ އައު ސީޕްލޭން ޓާމިނަލް މިއަދު ހުޅުވައިފިއެވެ.
މި ޓާމިނަލް ރަސްމީކޮށް ހުޅުވައިދެއްވީ ޓޫރިޒަމް، އަދި ސިވިލް އޭވިއޭޝަން މިނިސްޓަރު މުޙައްމަދު އަމީނެވެ.
ޓާމިނަލް ހުޅުވުމަށް ބޭއްވި ރަސްމިއްޔާތުގައި ވާހަކަ ދައްކަވަމުން މޯލްޑިވިއަން ހިންގާ އައިލެންޑް އޭވިއޭޝަން ކުންފުނީގެ މެނޭޖިން ޑިރެކްޓަރު އިބްރާހީމް އިޔާސް ވިދާޅުވީ، މޯލްޑިވިއަންގެ ސީޕްލޭން ޓާމިނަލުން މިހާތަނަށް 1.2 މިލިއަނަށް ވުރެ ގިނަ ފަސިންޖަރުން ދަތުރުކޮށްފައިވާ ކަމަށެވެ. އަދި އަންނަ އަހަރުގެ ތެރޭ މޯލްޑިވިއަންގެ ސީޕްލޭން ފްލީޓަށް، އަލަށް އުފެއްދި ދެ ސީޕްލޭނެއް ގެނެވޭނެ ކަމަށާއި އެކަމާ ގުޅޭ އެއްބަސްވުމުގައި މިދިޔަ އޮގަސްޓު މަހު ސޮއިކޮށްފައިވާ ކަމަށް އޭނާ ވިދާޅުވިއެވެ.
މިއަދު ހުޅުވި މޯލްޑިވިއަންގެ އައު ސީޕްލޭން ޓާމިނަލް ފަރުމާކޮށްފައިވަނީ ރާއްޖޭގެ ގުދުރަތީ ރީތިކަމާއި ސަގާފަތް ދައްކުވައިދޭ ފަދަ ގޮތަކަށެވެ. ޒަމާނީ ފެންވަރަކަށް ތަރައްގީކުރި މި ޓާމިނަލް ހުންނާނީ އޭސީކޮށްފައެވެ.
މޯލްޑިވިއަންގެ އައު ސީޕްލޭން ޓާމިނަލް ހުޅުވުމުގެ ރަސްމިއްޔާތުގެ ތެރެއިން -- ފޮޓޯ/ މޯލްޑިވިއަންމޯލްޑިވިއަނުން ބުނީ މި ޓާމިނަލުގެ އެތެރޭގައި ޖުމުލަ 90 މީހުންނަށް އެއްފަހަރާ ޚިދުމަތްދެވޭނެ ކަމަށާއި، އަދި ޓާމިނަލުގެ ބޭރުގައި އެއްފަހަރާ 40 މީހުންނަށް ޚިދުމަތްދެވޭނެ ކަމަށެވެ.
ދެ ފަންގިފިލާގެ މައްޗަށް އެކުލެވޭ މި ޓާމިނަލުގައި މޯލްޑިވިއަންގެ ސުވެނިއާ އާއި ކާބޯތަކެތި ހުންނަ ކިއޯސްކެއް ވެސް ހުންނާނެ ކަމަށާއި އެއް ފަހަރު ބޭނުންކުރުމަށް ފަހު އުކައިލާ ޕްލާސްޓިކު ރީސައިކަލްކުރެވޭނެ ގޮތް ވެސް ޓާމިނަލުގެ ތެރޭ ހަމަޖެހިފައިވާ ކަމަށް، މޯލްޑިވިއަނުން މައުލޫމާތުދެއެވެ.
އޭގެ އިތުރުން މޯލްޑިވިއަންގެ "ހުވަނދުމާ" ލައުންޖު ހިމެނޭހެން މަތީ ފަންގިފިލާގައި ޕްރައިވެޓް ދެ ލައުންޖެއް ހިމެނޭނެ ކަމަށާއި، ކުޑަކުދިން ކުޅޭނެ ޚާއްސަ ސަރަހައްދެއް ވެސް ސީޕްލޭންގެ ތެރޭ ގާއިމުކޮށްފައިވާނެ ކަމަށް، އެ ކުންފުނިން ބުންޏެވެ.
މި ވަގުތު މޯލްޑިވިއަންގެ ސީޕްލޭން ފްލީޓުގައި 11 ޓްވިން އޮޓާ ސީޕްލޭނެއް ބޭނުންކުރެއެވެ. އަދި ހަތަރު ރަށަކަށް އެ ސީޕްލޭންތައް ދަތުރުކުރެއެވެ.