ހުޅުމާލޭގެ ބައެއް ސަރަހައްދުތަކުން ކަރަންޓުގެ ޚިދުމަތް މެދުކެނޑިއްޖެއެވެ.
ކަރަންޓުގެ ޚިދުމަތްދޭ ސްޓެލްކޯއިން ބުނީ، ހުޅުމާލެ ފުރަތަމަ ފިޔަވަހީގެ ބައެއް ސަރަހައްދުތަކުން ކަރަންޓު ކެނޑުނީ ޓެކްނިކަލް މައްސަލައެއް ދިމާވެގެން ކަމަށެވެ.
އެ މައްސަލަ ދެނެގަނެ، ހައްލުކުރުމުގެ މަސައްކަތް ކުރަމުންދާ ކަމަށާއި ދިމާވެދާނެ ދަތިތަކަށް ސްޓެލްކޯއިން ވަނީ މައާފަށް އެދިފައެވެ.
ފާހަގަކުރެވޭ ގޮތުގައި، މިދިޔަ ބުރާސްފަތި ދުވަހު ވެސް ހުޅުމާލެ ފުރަތަމަ ފިޔަވަހީގެ ބައެއް ސަރަހައްދުތަކުން ކަރަންޓުގެ ޚިދުމަތް މެދުކެނޑުނެވެ.
ފާއިތުވި އަހަރުތަކުގައި މާލެއާއި ހުޅުމާލޭން ކަރަންޓު ކެނޑުމުގެ މައްސަލަތައް ވަނީ ބޮޑުވެފައެވެ. އެގޮތުން ހުރިހާ ސަރަހައްދަކުން ކަރަންޓު ކެނޑި 'ބްލެކްއައުޓް'އަކަށް ދިޔުމާއި، ހުޅުމާލެ ދެވަނަ ފިޔަވަހީގައި ގިނަ ބަޔަކު ދިރިއުޅޭ ޓަވަރުތަކުން ކަރަންޓު ކެނޑި ގިނައިރު ވުމުގެ މައްސަލަތައް ހިމެނެއެވެ.
ސްޓެލްކޯއިން އަންނަނީ، މާލެ ސަރަހައްދުގައި ކަރަންޓުގެ ޑިމާންޑް ބޮޑުވަމުން އަންނަ މިންވަރާ އެއްވަރަށް ކަރަންޓު ފޯރުކޮށްދިނުމަށް މަސައްކަތް ކުރަމުން އަންނަ ކަމަށް ބުނަމުންނެވެ.