ރ. މަޑުއްވަރީގައި ބިދޭސީ އަންހެނަކަށް ހަމަލާދީ، އޭނާގެ އަތުން ފައިސާ ފޭރުނު މައްސަލައެއްގައި ނޭޕާލަށް ނިސްބަތްވާ ފިރިހެނަކު ފުލުހުން ހައްޔަރުކޮށްފިއެވެ.
ފުލުހުން ބުނީ ރ. މަޑުއްވަރީގައި ބިދޭސީ އަންހެނަކާއި ފިރިހެނަކާ ދެމެެދު މާރާމާރީ ހިންގައި، އަންހެން މީހާގެ އަތުން ފައިސާ ފޭރުނު މައްސަލަ ފުލުހަށް ބުރާސްފަތި ދުވަހުގެ 06:04 ހާއިރު ފުލުހަށް ހުށަހެޅި ކަމަށެވެ.
އެ މައްސަލައާ ގުޅިގެން ހޮނިހިރު ދުވަހު ކޯޓު އަމުރެއްގެ ދަށުން 24 އަހަރުގެ ނޭޕާލް ފިރިހެނަކު ހައްޔަރުކޮށްފައިވާ ކަމަށް ފުލުހުން ވަނީ މައުލޫމާތު ދީފައެވެ.
އެ މައްސަލައާ ގުޅިގެން އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން ފަސް ދުވަހަށް ބަންދުކުރުމަށް ކޯޓުން އަމުރުކޮށްފައިވާ ކަމަށް ފުލުހުން ވަނީ މައުލޫމާތު ދީފައެވެ.
މި މައްސަލަ ތަހުގީގުކުރަމުންދާ ކަމަށް ފުލުހުން ވަނީ ބުނެފައެވެ.
ސޯޝަލް މީޑިއާގައި ހާދިސާއާ ގުޅޭ ވީޑިއޯއެއް ދައުރުވަމުންދާއިރު އެ ވީޑިއޯއިން ފެންނަނީ ބިދޭސީ ފިރިހެން މީހާ ބިދޭސީ އަންހެން މީހަކު ބިންމައްޗަށް ވައްޓާލައި، އޭނާގެ ގައި މައްޗަށް އަރައި އިން މަންޒަރެވެ. އަދި އަންހެން މީހާގެ އަނގަމަތީ އަތް އަޅައި ބާރުކުރާ މަންޒަރު ފެނެއެވެ. އަދި މަގުމައްޗަށް ގިނަ އަދަދެއްގެ ރުފިޔާ ވަޔަށް ބުރައިގެން ގޮސްފައި ހުރި މަންޒަރު ފެނެއެވެ.