ދުނިޔޭގެ ފަތުރުވެރިކަމުގެ ދުވަހާ ގުޅުވައިގެން ކްރޮސްރޯޑްސް މޯލްޑިވްސްގައި ރޭ ބޭއްވި “ވޯލްޑް ޓްރެވަލް އެވޯޑްސް އޭޝިއާ، އޯޝޭނިއާ އެންޑް އިންޑިއަން އޯޝަން ގާލާ ސެރެމަނީ 2026” ގައި އިންޑިއަން އޯޝަންސް ލީޑީން ޑެސްޓިނޭޝަންގެ މަގާމާއެކު ދިވެހިރާއްޖެއިން ޝަރަފުވެރި ފަސް އެވޯޑެއް ކާމިޔާބުކޮށްފިއެވެ.
މި ރަސްމިއްޔާތުގައި ރާއްޖެއަށް ލިބުނު އެވޯޑުތަކުގެ ތެރޭގައި އިންޑިއަން އޯޝަންސް ލީޑިން ޑެސްޓިނޭޝަން 2026، އިންޑިއަން އޯޝަންސް ލީޑިން ޑައިވް ޑެސްޓިނޭޝަން 2026، އިންޑިއަން އޯޝަންސް ލީޑިން ގްރީން ޑެސްޓިނޭޝަން 2026 އަދި އިންޑިއަން އޯޝަންސް ލީޑިން ހަނީމޫން ޑެސްޓިނޭޝަން 2026 ހިމެނެއެވެ. މީގެ އިތުރުން، އިންޑިއަން އޯޝަންސް ލީޑިން ޓޫރިސްޓް ބޯޑު 2026 ގެ ލަގަބު ލިބިފައިވަނީ ވިޒިޓް މޯލްޑިވްސް ކޯޕަރޭޝަން (ވީއެމްސީ) އަށެވެ.
ވޯލްޑް ޓްރެވަލް އެވޯޑްސް ރަސްމިއްޔާތުގެ ތެރެއިން: ރާއްޖެއަށް ވަނީ ފަސް އެވޯޑެއް ލިބިފައި-- ފޮޓޯ: ވިޒިޓް މޯލްޑިވްސްމި ހަފުލާގައި ރާއްޖޭގެ ފަތުރުވެރިކަމުގެ ސިނާއަތުގައި ހަރަކާތްތެރިވާ 15 އަށް ވުރެ ގިނަ ބްރޭންޑަކުން ވަނީ އިންޑިއާ ކަނޑުގެ އެކި ދާއިރާތަކުން އެވޯޑްތައް ހާސިލުކޮށްފައެވެ. އޭގެ ތެރޭގައި ރިސޯޓްތަކާއި، ލަގްޒަރީ ހޮސްޕިޓަލިޓީއާއި، އޭވިއޭޝަނާއި، ޑައިވިން އަދި އާއިލީ ދަތުރުތަކާއި ހަނީމޫން ދަތުރުތަކުގެ އިތުރުން ޕްރައިވެޓް އައިލެންޑް ތަޖުރިބާތަކާއި ސުޕަ ޔޮޓް ފަތުރުވެރިކަމާއި ޒިންމާދާރު ފަތުރުވެރިކަމުގެ ދާއިރާތައް ހިމެނެއެވެ.
ދުނިޔޭގެ 40 އަށް ވުރެ ގިނަ ގައުމުން ފަތުރުވެރިކަމުގެ ދާއިރާގެ އިސް ފަރާތްތައް ބައިވެރިވި މި ރަސްމިއްޔާތުގައި ވާހަކަދައްކަވަމުން ޓޫރިޒަމް އެންޑް ސިވިލް އޭވިއޭޝަން މިނިސްޓަރު މުހައްމަދު އަމީން ވިދާޅުވީ، 1972 ވަނަ އަހަރު އެންމެ ދެ ރިސޯޓާއެކު ފެށުނު ރާއްޖޭގެ ފަތުރުވެރިކަން މިއަދު ދުނިޔޭގެ އެންމެ ކާމިޔާބު އެއް ވާހަކައަށް ވެފައިވާ ކަމަށެވެ. އަދި ރާއްޖެ އިޝްތިހާރު ކުރުމުގައި ވިޒިޓް މޯލްޑިވްސްއިން ކުރަމުންދާ މަސައްކަތްތައް ފާހަގަކުރައްވައި، ދެމެހެއްޓެނިވި ފަތުރުވެރިކަމުގެ މުހިންމުކަމުގެ މައްޗަށް މިނިސްޓަރު އަލިއަޅުވާލެއްވިއެވެ.
މި ރަސްމިއްޔާތުގައި ވޯލްޑް ޓްރެވަލް އެވޯޑްސްގެ ފައުންޑާ އަދި ޕްރެޒިޑެންޓް ގްރަހަމް ކުކް ވެސް ބައިވެރިވެވަޑައިގަތެވެ.
ވިޒިޓް މޯލްޑިވްސްގެ ސީއީއޯ އަދި މެނޭޖިން ޑައިރެކްޓަރު އަބްދުﷲ ޔާސިރު ވިދާޅުވި ގޮތުގައި، މި ލިބުނު ފަސް އެވޯޑަކީ ދިވެހި ފަތުރުވެރިކަމުގެ ވަރުގަދަކަމާއި މުއްސަނދިކަން ރަމްޒުކޮށްދޭ ކަމެކެވެ. އަދި މިއީ ދުނިޔޭގެ ފަތުރުވެރިންނަށް ރާއްޖެއިން ފޯރުކޮށްދޭ ފެންވަރު ރަނގަޅު ހިދުމަތްތަކާއި ތަފާތު ތަޖުރިބާތަކުގެ ނަތީޖާ ކަމަށް އޭނާ ފާހަގަކުރެއްވިއެވެ.
ވޯލްޑް ޓްރެވަލް އެވޯޑްސް ރަސްމިއްޔާތުގެ ތެރެއިން: ރާއްޖެއަށް ވަނީ ފަސް އެވޯޑެއް ލިބިފައި-- ފޮޓޯ: ވިޒިޓް މޯލްޑިވްސްރާއްޖެއަކީ 2020 އިން 2025 އަށް ޖެހިޖެހިގެން ހަ އަހަރު ދުނިޔޭގެ އެންމެ ކުރިއަރާފައިވާ މަންޒިލްގެ މަގާމު ހޯދާފައިވާ ގައުމެކެވެ. މީގެ ކުރިން ވެސް ރާއްޖެއިން ވަނީ "ވޯލްޑްސް ލީޑިން ޓޫރިސްޓް ބޯޑު" އާއި "ވޯލްޑްސް ލީޑިން ގްރީން ޑެސްޓިނޭޝަން" އަދި "ވޯލްޑްސް ލީޑިން ބީޗް ޑެސްޓިނޭޝަން" ފަދަ ޝަރަފުވެރި މަގާމުތައް ކާމިޔާބުކޮށްފައެވެ.
މީގެ 33 އަހަރު ކުރިން 1993 ވަނަ އަހަރު އުފެދުނު ވޯލްޑް ޓްރެވަލް އެވޯޑްސްގެ މިއަހަރުގެ ގާލާ ރަސްމިއްޔާތުގެ ޓައިޓަލް ސްޕޮންސަރަކީ ބޭންކް އޮފް މޯލްޑިވްސްއެވެ. މީގެ އިތުރުން އުރީދޫ، ޕްރިންޓް ލެބް، އެލައިޑް އިންޝުއަރެންސް، އެމްއޭސީއެލް، ޖަލްބޫތު، އިވެންޓް މޯލްޑިވްސް، މޯލްޑިވިއަން އަދި އެސްޓީއޯ އެނަޖީގެ އެހީތެރިކަން މި ހަފުލާއަށް ލިބިފައިވެއެވެ.