ކުރިއާ އަޅާބަލާއިރު، ގޭންގު ކުށްތައް މަދުވެއްޖެ ކަމަށާއި 10 ގޭންގެއްގެ މައްސަލަ ބަލަމުން އަންނަ ކަމަށް ހޯމް މިނިސްޓަރު އަލީ އިހުސާން މިރޭ ވިދާޅުވެއްޖެއެވެ.
އަހާ ފޯރަމުގައި މީހަކު ކުރި ސުވާލަކާ ގުޅިގެން މިނިސްޓަރު ވަނީ، ރާއްޖޭގައި ޒަމާންވީ ގޭންގުގެ މައްސަލައަށް އަލިއަޅުވާލައްވާފައެވެ.
އެގޮތުން، 2007 އަހަރުން ފެށިގެން މި ސަރުކާރު ހަވާލުވަންދެން ގާތްގަނޑަކަށް ކޮންމެ އަހަރަކު ދެއަކާއި ފަހަކާ ދެމެދުގެ އަދަދަކަށް ގޭންގު ކުށްތަކުގައި ޒުވާނުން ގަތުލުކުރަމުން ދިޔަ ކަމަށް އިހުސާން ވިދާޅުވިއެވެ.
އެ މައްސަލަ ހައްލުކުރުމަށް ކުރި މަސައްކަތުން ގޭންގުތައް ހިންގާ ސަރަހައްދުތަކުގައި މިހާރު ފުލުހުން ގިނަ ވާނެ ކަމަށާއި އެ ފަދަ ކުށްތަކުގައި އުޅޭ މީހުން އެ ކުށުން ދުުރުވުމަށް އިޚުތިޔާރު ދީފައިވާ ކަން މިނިސްޓަރު ފާހަގަކުރެއްވިއެވެ.
އޭގެތެރެއިން ގިނަ ކުދިން ގޭންގުތަކާ ދުރުވެ، ވަޒީފާތަކާ ގުޅިފައިވާ ކަމަށާއި މިހާތަނަށް ގޭންގުތަކާ ގުޅޭ 53 އޮޮޕަރޭޝަން ހިންގުނުކަން މިނިސްޓަރު ވަނީ ހާމަކުރައްވާފައެވެ. 10،450އެއްހާ މީހުން ޗެކުކޮށް، އޭގެތެރެއިން 517 ވަނީ ހައްޔަރުކޮށްފައެވެ. އަދި، އެ މީހުންނާ ގުޅޭ 670 ސައިކަލު ޓޯކޮށްފައިވާކަން މިނިސްޓަރު ފާހަގަކުރެއްވިއެވެ.
"ނަތީޖާއަކީ ކުރިން ފަލަ ސުރުހީތަކުން ފެންނަ ގޮތަށް އެ ތަނުން ވަޅި ޖަހައިގެން މި ތަނުން ޖަހައިފި. މިހެން ތަޅާ މަރަނީ. އެހެން ތަޅާ މަރަނީ. މި ވާހަކަތައް މަދުވާނެ މިހާރު. އަދި، ފާއިތުވި ތިން އަހަރު އަޅުގަނޑުމެންގެ ސަރުކާރުގައި އަދި އެއްވެސް ދިވެހި ރައްޔިތެއްގެ ފުރާނައެއް ގޭންގު މާރާމާރީއެއްގައި ގެއްލިފައެއް ނުވާނެ،" އިހުސާން ވިދާޅުވިއެވެ.
އިތުރަށް ވާހަކަދައްކަވަމުން މިނިސްޓަރު ވިދާޅުވީ، ކުޑަކުދިން ގޭންގުތަކަސް ވައްދަން ސޭފް ހައުސްގެ ގޮތުގައި ހިންގި 26 ތަނެއް ބަންދުކޮށްފައިވާ ކަމަށާއި މިދިޔަ ޖޫން މަހުން ފެށިގެން 10 ގޭންގު ލީޑަރެއްގެ މައްސަލަ ތަހުގީގު ކުރަމުން އަންނަ ކަމަށެވެ.
ފާހަގަކުރެވޭ ގޮތުގައި، ސަރުކާރުން ގެންގުޅޭ ސިޔާސަތުގެ ސަބަބުން ގޭންގުތަކުގައި ޒުވާނުން މިހާރު ނޫޅޭ ކަމަށާއި ކޯޓަށް ގޮސް ގޭންގުގެ ގޮތުގައި ކަނޑައަޅާނެ ބަޔަކު ނެތް ކަމަށް މިދިޔަ ނޮވެންބަރު 17ގައި ރައީސް ޑރ. މުހައްމަދު މުއިއްޒު ވަނީ ވިދާޅުވެފައެވެ.
ގޭންގުތަކުން މުޖުތަމައުގައި ކުށްތައް ކުރާތަން ފެންނަން ބޭނުންނުވާ ކަމަށް ވިދާޅުވެ، އެ ފަދަ ކަންކަމުގައި އުޅޭ ހުރިހާ ޒުވާނުން ހުރިހާ ކަމެއް ދޫކޮށްލަން ރައީސް އޭރު ވަނީ އިލްތިމާސްކުރައްވާފައެވެ.