ހުޅުމާލެ ފޭސް އެކެއްގައި އޮތް އެތުލެޓިކްސް ސިންތެޓިކް ޓްރެކް ހަލާކުވެ، އެތުލީޓުންނަށް އަނިޔާވުމުގެ ނުރައްކާ ބޮޑުވެފައިވަނިކޮށް، ބައިނަލްއަގުވާމީ ފެންވަރުގެ އައު ސިންތެޓިކް ޓްރެކެއް އެޅުމުގެ ބޮޑު މަޝްރޫއެއް އަންނަ އޮކްޓޯބަރު މަހުގެ އެއްވަނަ ދުވަހު އަމަލީ ގޮތުން ފެށުމަށް ނިންމާފައިވާކަން ހާމަކޮށްފިއެވެ.
ރައީސް އަބްދުﷲ ޔާމީން އަބްދުލް ގައްޔޫމްގެ ވެރިކަމުގައި ގާއިމުކުރި މި ޓްރެކުގެ ސިންތެޓިކްގަނޑު ހަލާކުވެ، ދުވާ އެތުލީޓުންނަށް ތަފާތު ގެއްލުންތަކާ ކުރިމަތިލާންޖެހޭ ކަމުގެ ޝަކުވާތައް ވަރަށް ގިނައެވެ. އަދި ކުޅިވަރާ ގުޅުން ނެތް ގިނަ އިވެންޓުތަކެއް އެތަނުގައި ބާއްވާ. ޓްރެކަށް ގެއްލުންވާ ގިނަ ކަންތައްތަކަކާ ކުރިމަތިލާން ޖެހިފައިވެއެވެ.
ސަރުކާރުން ގެނެސްދޭ "އަހާ" ފޯރަމުގައި ވާހަކަދައްކަވަމުން ކުޅިވަރު ވަޒީރު ޢަބްދުﷲ ރާފިޢު ވިދާޅުވީ މި މައްސަލައަށް ދާއިމީ އަދި ފުރިހަމަ ހައްލެއް ހޯދައިދިނުމުގެ ގޮތުން، މިހާރު އޮތް ހަލާކުވެފައިވާ ޓްރެކުގެ ބަދަލުގައި، މުޅި ޓްރެކްގެ މެޓީރިއަލްއާއި އަޑީގައިވާ ބޭސް އެއްކޮށް ނަގައި، މުޅިން އައު މެޓީރިއަލް ބޭނުންކޮށްގެން އަލުން އަޅަން ނިންމާފައިވާ ކަމަށެވެ.
ވަޒީރު ވިދާޅުވީ އަންނަ އޮކްޓޯބަރު މަހުގެ އެއްވަނަ ދުވަހުން ފެށިގެން ކުރިއަށްދާ މަރާމާތުގެ މަސައްކަތްތައް ނިންމައި، އަންނަ ޖަނަވަރީ މަހުގެ ނިޔަލަށް އައު ޓްރެކް އެއްކޮށް ބޭނުންކުރެވޭވަރުވާނެ ކަމަށެވެ.
މި މައްސަލައިގެ އެންމެ ބޮޑު ކަންބޮޑުވުމަކީ، ހުޅުމާލޭގައި މިހާރު އޮތް ޓްރެކަކީ ދުނިޔޭގެ މިންގަނޑަށް ފެތޭ ތަނަކަށް ނުވުމެވެ. ވޯލްޑް އެތުލެޓިކްސްގެ އުސޫލުތައް ހުންނަ ގޮތުން، އެތުލީޓަކު ގައުމީ ނުވަތަ ދުނިޔޭގެ ރެކޯޑެއް މުގުރާލި ކަމުގައިވިޔަސް، އެ ރެކޯޑެއް ބަލައިގަންނަނީ ހަމައެކަނި އެ އެސޯސިއޭޝަނުން ގަބޫލުކުރާ ފެންވަރުގެ ސާޓިފައިޑް ޓްރެކްތަކުގައި ނެރޭ ނަތީޖާތަކަށެވެ.
މީގެ ސަބަބުން، މިހާރުގެ ޓްރެކްގައި ދުވެގެން އެތުލީޓުން ނެރޭ ރަނގަޅު ނަތީޖާތަކާއި ހަދާ ރެކޯޑްތައް ބައިނަލްއަގުވާމީ ގޮތުން ގަބޫލުނުކުރެވޭ މައްސަލައަށް ވަނީ ކުރިމަތިވެފައެވެ.