ފަހުގެ ދިރާސާތަކުންނާއި، ވަޒީފާގެ ބާޒާރުން ފާހަގަކުރެވޭ އެއް ކަމަކީ، ޖެން-ޒީ ޖީލުގެ މީހުން ވަޒީފާގެ އިންޓަވިއުތަކަށް 'އައިސް ލާޓޭ'އެއް ނުވަތަ މިފަދަ ބުއިމެއް ހިފައިގެން ހާޒިރުވުމެވެ.
މިއީ 'މިލީނިއަލްސް' ނުވަތަ އެއަށްވުރެ ދޮށީ ޖީލުތަކުގެ މީހުންނަށް އާދަޔާޚިލާފު، އަދި ބައެއް ފަހަރު ކުޑަކޮށް ނުގުޅޭ ކަމެއްގެ ގޮތުގައި ފެންނަ ކަމެކެވެ.
މިކަން ވަޒީފާގެ މާޙައުލެއްގައި ތަސައްވުރުކޮށްލުމަށްޓަކައި، އިންޓަވިއުއަކަށް ދާއިރު ކޮފީ ފިހާރައަކުން 'އައިސް ލާޓޭ'އެއް ނުވަތަ 'އައިސް އެމެރިކާނޯ'އެއް ގަނެ، އިންޓަވިއުއަށް ހާޒިރުވެ، އިންޓަވިއު ކުރިއަށްދާއިރު އެ ބުއިމުން ބޮމުން ސުވާލުތަކަށް ޖަވާބު ދެމުންދާ މަންޒަރު ހިތަށް ގެނައުމަކީ އެކަށީގެންވާ ކަމެކެވެ.
ޖެން-ޒީ ޖީލުގެ ބައެއް ޒުވާނުންނަށް، އައިސް ކޮފީއަކާ އެކު އިންޓަވިއުއަށް ދިއުމަކީ އެއްވެސް މައްސަލައެއް ނޫން ކަމުގައި ދެކެއެވެ. އެއީ ހަމައެކަނި ކޮފީއެއް ކަމަށް އެމީހުން ބަލާއިރު، މިލީނިއަލް ނުވަތަ ޖެން-އެކްސް ޖީލަށް ނިސްބަތްވާ ވަޒީފާ ދޭ ފަރާތްތަކަށް މި މަންޒަރު ފެނުމުން، އިންޓަވިއުއެއްގައި އަދަބުވެތިކަމާއި ރަސްމިއްޔާތު ހިފެހެއްޓުމާ މެދު ސުވާލުތައް އުފެދިދާނެއެވެ.
ޒުވާނުންތަކެއް ވަޒީފާގެ މަސައްކަތްތަކުގައި ހަރަކާތްތެރިވަނީ--ފޮޓޯ/ފޭސްބުކްމިއީ ޖެން-ޒީ އާއި މިލީނިއަލްސްއާ ދެމެދު ވަޒީފާގެ މާޙައުލުގައި އުފެދިފައިވާ ސަޤާފީ ތަފާތުތަކަށް އަލިއަޅުވައިލާނެ އާ ކަމެކެވެ. މި ދެ ޖީލުގެ މީހުން ވަޒީފާއާ މެދު ދެކޭ ގޮތް ތަފާތުކަމަކީ މިހާރު ހާމަވެފައިވާ ޙަޤީޤަތެކެވެ. ދިރާސާތަކުން ދައްކާ ގޮތުގައި، މިލީނިއަލްސް އިން ބޮޑަށް އިސްކަންދެނީ ބުރަކޮށް މަސައްކަތްކޮށް، މަޤާމުގެ ކުރިއެރުން ހޯދުމަށެވެ. ނަމަވެސް ޖެން-ޒީ ޖީލުގެ މީހުން އިސްކަންދެނީ ނަފްސާނީ ހަމަޖެހުމާއި މަސައްކަތާއި އަމިއްލަ ދިރިއުޅުން ހަމަޖެއްސުމަށެވެ.
މި ބަހުސް ފެށިފައިވަނީ ފްލޮރިޑާގެ ރެކްރޫޓްމަންޓް އެޖެންސީއެއްގެ ރައީސާ، ކެއިޓްލިން ވެހްނިއައިނެން، ޓިކްޓޮކްގައި ޙިއްސާކުރި ވީޑިއޯއަކާ ގުޅިގެންނެވެ. އޭނާ ހާމަކުރި ގޮތުގައި، އޭނާގެ ކުންފުންޏަށް އިންޓަވިއުއަށް އަންނަ ޖެން-ޒީ ކުދިން 'އައިސް ކޮފީ' ހިފައިގެން އައުމަކީ އާންމު ކަމެކެވެ. އޭނާ ދެކޭ ގޮތުގައި، މިގޮތަށް ކޮފީ ހިފައިގެން އައުމުން، އެ ކުއްޖާ އިންޓަވިއުއާ މެދު މާބޮޑު ސީރިއަސްކަމެއް ނުބަހައްޓާ ކަމުގެ އިހުސާސް ކުރެވެއެވެ.
މި ވީޑިއޯ ވަނީ ވަރަށް ބޮޑަށް އާންމުވެ ގިނަ ބައެއްގެ ސަމާލުކަން ހޯދާފައެވެ. ބައެއް މީހުން ދެކޭ ގޮތުގައި އިންޓަވިއުއަކަށް ދާއިރު ވަކި އަދަބުތަކެއް ހިފަހައްޓަން ޖެހޭނެއެވެ. އަނެއް ބަޔަކު ސުވާލު ކުރަނީ 'އައިސް ކޮފީއެއް' އަތުގައި އޮތުމުން އިންޓަވިއުއަށް ނުފޫޒު ފޯރަންވީ ކީއްވެގެންތޯއެވެ.
އެހެންކަމުން، ކޮފީ ތަށްޓެއްގެ ސަބަބުން ވަޒީފާ ގެއްލިދާނެ ހެއްޔެވެ؟ މި ސުވާލުގެ ޖަވާބު ސީދާކޮށް ދިނުމަކީ ދަތި ކަމެއް ނަމަވެސް، ޖެން-ޒީ ޖީލުގެ މީހުން ނޭނގި ތިބެ ވަޒީފާ ދޭ ފަރާތްތައް ހިތްހަމަނުޖެހޭ ފަދަ ގިނަ ކަންކަން ކުރާ ކަމަށް ވެސް ކެއިޓްލިން ވެހްނިއައިނެން ބުނެފައިވެއެވެ.
އޭގެތެރޭގައި، އިންޓަވިއު ފެށެން ފަސް މިނެޓަށް ވެފައި ވަނިކޮށް، އިންޓަވިއު ގަޑި ބަދަލުކޮށްދިނުމަށް އެދި މެސެޖުތައް ފޮނުވުމާއި، ސްނީކާސް އާއި އޯވަސައިޒް ޓީޝާޓާއި، ކުލަ ޖައްސާފައިވާ އިސްތަށިގަނޑާއެކު އިންޓަވިއުއަށް ހާޒިރުވުން ހިމެނެއެވެ.
އަދި ހަމައެއާއެކު ކޯޕަރޭޓް މުއާމަލާތްތަކަށް ވެސް މިހާރު ވަނީ ބޮޑެތި ބަދަލުތަކެއް އައިސްފައެވެ.
ވަޒީފާ ދޭ ފަރާތްތައް އެންމެ ހައިރާންކުރުވާ ކަމަކީ ރަސްމީ އީމެއިލްތަކުގައި ޖެން-ޒީ ޖީލުގެ މީހުން އިމޯޖީ ބޭނުންކުރުމެވެ. އެއްފަހަރަކު މުސާރައާ މެދު ވާހަކަދެއްކިއިރު، މީހަކު ވަނީ "މޯޅިވެފައިވާ މަލެއްގެ" އިމޯޖީއެއް ފޮނުވާފައެވެ. މީގެ މާނަ ދެނެގަތުމަށް ވަޒީފާ ދޭ ފަރާތުން ގޫގުލްގެ އެހީ ހޯދަން ޖެހުނު ކަމަށް ބުނެފައިވެއެވެ.
ޚަބަރެއް ނުވުމާއި ކުއްލިއަކަށް ވަޒީފާއިން ވަކިވުމަކީ ވެސް މިހާރުގެ ވަޒީފާގެ ބާޒާރުގައި ފެންނަ ކަމެކެވެ. އިންޓަވިއުއަށް އަންނާނެ ކަމަށް ބުނެފައި ނައުމާއި، ވަޒީފާގެ ފުރުސަތު ޤަބޫލުކުރުމަށްފަހު ފޯނަށް ޖަވާބު ނުދިނުމަކީ ބައެއް ޒުވާނުން ކުރާ ކަމެކެވެ. އަދި ބައެއް މީހުން މުސާރަ ލިބޭ ދުވަހު ލެޕްޓޮޕް ހަވާލުކުރުމަށްފަހު، އެއްވެސް އެންގުމަކާ ނުލައި ވަޒީފާއިން ވަކިވާ ކަމަށް ވެސް ފާހަގަކުރެވެއެވެ.
ކުރީގެ ޖީލުތަކުގެ މީހުން ވަޒީފާ ލިބުމުގެ ކުރިން އަހަން ނުކެރޭ ފަދަ ސުވާލުތައް ޖެން-ޒީ ޖީލުގެ މީހުން ކުރެއެވެ. މިސާލަކަށް، ރޭގަނޑު ހަތެއްގެ ފަހުން އޮފީހުގެ މެސެޖުތަކަށް ޖަވާބު ދޭންޖެހޭނެތޯ އިންޓަވިއުގެ ފުރަތަމަ ބުރުގައި ވެސް އެމީހުން އަހައެވެ. މިއީ ވަޒީފާއަށް ދޭ ސަމާލުކަން ކުޑަވުން ނޫން ކަމަށާއި، އެއީ މަސައްކަތާއި އަމިއްލަ ދިރިއުޅުމުގެ އިންތައް ބަހައްޓަން އެމީހުން ބޭނުންވާ މިންވަރު ކަމަށް ބައެއް އެޗްއާރް މާހިރުން ދެކެއެވެ.
ޖެން-ޒީ ކުދިން އިންޓަވިއުއަށް ދަނީ ހަމައެކަނި ވަޒީފާ ދޭ ފަރާތަށް އެމީހުން ކަމުދޭތޯ ބަލާކަށް ނޫނެވެ. އެއީ އެ ކުންފުންޏަކީ އެމީހުންނާ ގުޅޭ ތަނެއްތޯ ބެލުމަށް ދާ ދެކޮޅަށް ހުޅުވިފައިވާ ފުރުސަތެއްގެ ގޮތުގައެވެ. އޮފީހުގެ ސަގާފަތާއި މަސައްކަތު ގަޑިތަކާއި، އަދި އިތުރު ފުރުސަތުތަކާ ބެހޭގޮތުން އެމީހުން ސުވާލުކުރެއެވެ.
މިއީ ހަމައެކަނި ފެށުމެކެވެ. ޖެން-ޒީ ޖީލުގެ މީހުން ވަޒީފާއާ ގުޅުމުން، އޮފީސް މާހައުލަށް އަންނަ ބަދަލުތައް މިއަށްވުރެ މާ ބޮޑެވެ.